KELEBU

BETAWI TEMPO DOELOE

Kelebu

Abis onoh rumah pada ngebak,ampe kiatan genteng ngah doang, aer kali kelebu bikin rumah nyeng pada ngejogrog di pinggirannya nya pada kebanjiran alias kelebu kaga ketulungan,mobil,motor sudahan sepeda mah pada nganyut di bawa aer belon banda nyeng laen nyeng kaga bisa keburu di indit bures pisan dah.

Jaman dulu mah kali kelebu ge kaga bikin rumah pada kerendem kaya karang,paling nyeng kerendem tanduran ,kebon timun,kebon kacang ama ngempang orang pada limpas aernya bikin ikan nya pada budal ke mana-mana ngikutin aer ama jembatan pada manting kegerus aer entuh ge jembatan nyeng dibikin dari bambu atawa batang kayu kelapa, kalo rumah mah palingan nyeng punya banda uman di pinggiran kali doang nyeng nekat jalanan aer dibikin rumah,lah kalo orang karang pan emang pada rada kaga engeh ama nyeng begituan ,ngiat bacaan iklan perumahan nyeng katanya bebas banjir apalagi cicilan nya rada murah lupa dah kalo jalanan dan tempat aer di tempatin ,baru engeh pas rumahnya udah pada ngambang kaya anuan.

Kelebu jaman dulu entuh tanduran pada kerendem tapi Alhamdulilahnya kaga pada abis kebawa aer,aer surud entuh tanduran bisa dibenerin lagi paling kebonan nyeng rada rusak ama ngempang nyeng ikan nya pada budal,entuh orang mancing pada ngejongkot di kebon kacang orang lah pada dapet gerame,lele ama ikan mas nyeng pada budal masuk ke kebon kacang nyeng kelebu,lah entuh ampe ada nyeng dapet ikan ampe karungan bikin nyeng punya pada ngenes ama pada memble ngiatnya,lah abis mo di bilang apa nyeng namanya musibah paling nyeng punya ngempang cuman pada ngurut dada ama bilang belon rejekinya doang .

Banjir dulu tibang aer kali pada limpas udah gitu ge gampang surudnya entuh aer pada numpang lewat doang saking kaga muatnya aer di kali kaga ngerusak nyeng laen-laen seperti engeh kalo entuh bukan lahan dia,abis kali kelebu biasanya entuh orang pada nyari kayu nyeng pada nyangkut di puun gelaga buat di bikin kayu bakar,kalo kali kelebu dulu banyak kayu dari puunan nyeng udah kering pada kebawa aer,bambu ada juga balok kayu orang nyeng pada kebawa dan nyangkut di puun gelaga dan bambu atawa pada nyangkut di ladon pas aer kali kering .

Nyeng kita demen kalo ujan rada awet entuh comberan pada luber aernya, entuh lele comberan pada nganyut lewat teritipan rumah,entuh bocah nyeng lagi pada maen ujanan pada ngudag-ngudag lele kanyut,orang dulu pan nyeng namanya comberan dulu mah biar nyamuk kaga pada tinggal di situ entuh comberan pada di lepasin ikan lele lokal nyeng rada kuat ama bau sabun dan shampo.

Dapet lele comberan luber atawa kelebu di teritipan rumah kita siangin ,kita berseiin kita bakar di tungku dapur nyeng rada marong,ampe sedikit rada geseng langsung kita cemplungin di kuah pecakan nyeng rada pedes,entuh biar entuh lele bau sabun bekas orang mandi tapi gurihnya bikin bulu mata ampe copot,apalagi makan nya pas lagi ujan rerimutan ,nasi masing anget,kuah pecak pedes nyeng masing anget tambah sambel goang ama lalab jengkol muda bikin ujan turun jadi berasa rahmat dan nikmatnya….

Bang ILok
Betawi punya cerita

Jumat, 3 Januari 2020