BETAWI TEMPO DOELOE
Burung Celepuk
Malem abis ujan, suasana kehidupan malem jadi rada sepi,orang ogah kuar mending pada ngumpul ama keluarga di rumah bari dengerin sandiwara radio sambil geragotin ganyong ama lipung rebus.
Dulu kalo abis ujan begini entuh yang namanya suara kodok belentung manting ambreg di belakang rumah, apalagi rumahnya pinggiran sawah,belentung ama bancet pada saling sautan resep bet udah kaya tabuan tanjidor.
Sekarang mah udah enak kalo pas musim ujan turun nya malem ari perut kita mules pengen kebelakang tinggal ke WC yang ada di dalem ,lah dulu kalo malem ari perut mules kita kebelet ,mana lagi ujan jeramba( jamban) jauh di belakang,entuh kita pake kudungan tampah ngungkug ke ngempang, perut lagi saking mulesnya,kita udah kedagar-dagar ke cubluk atawa comberan eh ampe sono udah ada nyeng duluin..udah gitu entuh nyeng duluin dekem nya lama,romanah mules abis makan rujak bebek,terpaksa dah kita nyende dulu di pager rumah sambil ngusap-ngusap perut jangan ampe berolo duluan.
Kita lagi asyik nongkrong di jeramba eh ditemenin ama suara burung celepuk nyeng nangkring di atas puun dukuh,lah orang yang rada pengekek ( takut) mah bisa anu yang baru nontot bisa nyeropot lagi,sokan kata orang tua entuh kalo ada suara celepuk sokan ditemenin ama suara Kuntilanak,mitos entuh yang bikin orang pada iseng(takut).
Burung celepuk atawa burung hantu dulu rada nakutin lah sekarang kita berasa kangen ama suaranya,entuh burung udah kaga kedengeran lagi suaranya di kampung kita, seperti ilang begitu aja,suara entuh burung biar bikin begidig tapi juga nyeng bikin tidur kita pules, sekarang suara burung celepuk tinggal jadi Ringtone hape doang…..puk muke luh kaya sendok!!!!….
Betawi punya cerita
Bang ILok