BETAWI PUNYA CERITA
Munggahan
Oleh : Bang Ilok
Kalo ari mo munggahan entuh nyeng namanya pasar ampe penuh, susah buat nyelag romanah, entuh tukang daging, tukang ayam ama tukang ikan ampe kaga kiatan mukanya saking keurugan ama orang nyeng pada antri beli
Babe kalo Munggahan dulu paling demen beli ikan bandeng,ikan bandeng dimasak kuning, masaknya dibikin rada banyakan buat dibawain ke engkong ama sedara nyeng lebih tua dan mertuanya,tanda nyambung maaf dan silaturahmi mao puasa.
Sayur bandeng dikuningin dulu mah mesti ada kalo mao munggah,dimasak buat makan eni ari ama diangetin dah buat saur.Sebelon dimakan ntuh sayur bandeng dibacain doa dulu dan dirowahin,baru setelah entuh dimakan rame-rame,makan nya pake beras padi baru, masaknya rada akas biar pas dikuain entuh nasi kaga meluyah, rasanya wah udah kaga bisa dibayangin dah … enaknya ntuh sayur bandeng buatan emak.
Makan sayur bandeng kudu ati-ati banyak tulang alusnya ntar bisa ketulangan,dan yang namanya tulang bandeng rada susah diakalin kalo udah nyangsrang di tenggorokan.Tapi entuh nyeng namanya kulit ikan bandeng nyeng ngelekab pas lagi di masak rasanya gurih bener dah,mungkin ntuh yang bikin orang kaga kapok makan sayur bandeng emang karena ngangenin dan rasanya nikmat beud dah, ongkohan dulu mah kalo ketulangan tibang narik-narik kuping bari ngeong kaya kucing ge ketulangan bisa ilang.
Kaga heran kalo mo munggah ntuh Bandeng,ayam daging ampe kelapa ama Pete musti naek,karena emang banyak diburu orang,bagen dah nyeng penting ntuh masakan kudu ada biar bocah saur pada nafsu,siangnya kaga pada lemes,tapi orang dulu mah tibang saur ama ikan bulu ayam ama sayur timun bening ge udah sumbrah beud.
Abis makan sayur bandeng rambut rada bau amis, karena kekedik pas makan,buru dah keramasan …Baba udah nyiapin bakaran merang nyeng ditaro di tengkat,dikasi aer disaring pake kudungan keramas dah kita tuh besuci,biar wangi pakein kembang kenanga dikit.
Munggahan karang mah romanah rame di pasar doang kon,kaga ada suara bedug pisan nyeng kedengeran dari langgar atawa mesjid, mesjid karang mah udah kaga make bedug lagi kon kaga kaya dulu kalo ari munggahan entuh bocah pada ngetes nakol bedug buat ngeramein bulan puasa,apalagi sekarang ada wabah corona entuh mesjid ama musholla tambah amleng bangat dah nuansa bulan puasa nya kaga kiatan pisan…
Bang ILok
(Ketua Yayasan Kebudayaan Orang Bekasi, KOASI)