BETAWI PUNYA CERITA
Nempong Capi
Kalo kita ngiat buah capi pada manting mendot, apalagi entuh capi udah pada kuning, bikin iler kita kaga kerasa netes ngiatnya, ujug – ujungnya udahan dah kita ambil batang kayu singkong kita tempongin dah entuh capi, kena tangklean nya pada merutug dah entuh capi, eh jatohnya pas tanah kelang lah entuh capi jadi pada mangap kiatan isinya nyeng rada pulen, enak dah kaga geragot lagi entuh capi tinggal belah aja.
Makan buah capi kalo bijinya kaga ditelen berasa kaga puas,udah gito go kurang kenyang, apalagi capi nya capi daon nyeng rada monyong ujungnya, biar masing rada ijo kulitnya tapi rasanya udah manis kaga puas bet kalo kaga di telen makan nya, sudahan kalo engkong liat banyak lepehan biji capi pada ngambak dijogan rumah,bisa kena omelan, engkong kaga demen ama orang yang makan buah capi pada di lepihin,jorok ah udah gitu kalo mo di sapu ntuh lepehan biji capi nempel di tanah.
Emang sih makan capi ditelenin biji nya bikin kenyang ,cuman nongkrong nya rada ribed kuarnya, soalnya ntuh biji capi pada keluar masih utuh,kaga bisa dicerna pisan ama ucus, bikin berak rada mejen susah kuarnya,saking keras ya entuh biji nyeng kaga ke cerna kuar dari anu kita.
Kalo kita habis nelen biji capi terus nongkrong nya di kebon,kata orang kita jadi penyumbang reboisasi alias penghijauan kembali utan yang udah pada botak,ntuh biji capi yang kita kuarain di kebon setelah semingguan kita longok udah pada numbuh jadi bibit puun capi.
Bisa jadi capi yang pernah kita makan juga dulunya,ntuh puun nya bolehan engkong kita pada nongkrong atawa bisa juga buah capi yang kita makan sekarang dari puun bolehan engkong kita nongkrong dikebon pas masing pada bocah dulu.
Bagen dah dari mana asalnya entuh puun capi tapi emang buahnya bikin kita pada demen, kalo pagi ari kita demen maen di kebon nutur buah nyeng pada merutug di orang kalong salah satunya ya entuh buah capi, kalo pagi pada ngampar di bawah pu-un nya, namanya masing bocah kaga resep romanah kalo kaga geragot capi yang pada jatoan kaga peduli ari masing pagi entuh capi maen sikat aja, tapi kudu ati-ati makan capi jatoan banyak nyeng udah pada lodoh (busuk)
Entuh bocah abis nyarap capi jatoan perutnya pada mules kaga ketahanan lari ke ngempang eh pada nongkrong di kebon entuh biji capi nyeng udah ke telen pada kuar lagi, lah seminggu lagi kita liat entuh biji capi nyeng kita buang udah manting merotok jadi bibit pu-un capi…….
Bang ILok