BETAWI PUNYA CERITA

Pasar Balikan

Oleh : Bang Ilok

Entuh nyeng namanya pasar di mana ge kalo udah jatoh arinya pasar balikan,orang dari mana aja tumplek disitu,kita mao gegaruk aja romanah kaga bisa saking penuhnya.Ada nyeng nyari pakean buat lebaran,belanja kue, beli daging buat olahan dihari raya dan nyeng beli apa aja go ada diari itu,semua orang pada nyari kebutuhan buat lebaran di pasar

Semua belanjaan buat olahan Lebaran harganya pada naek dua kali lipet,daging,ayam,kelapa ampe pete harganya bisa ceban sepapan,tapi bagen dah mahal go demi belain hari raya nyeng datengnya setaun sekali mah kudu diturutin,emang udah dari dulunya begonoh ya kudu pada maklum dah,Lebaran gitu loh.

Entuh orang pulang pasar pada nenteng rinjing ampe teregeng-regeng saking banyaknya nyeng dibeli,mana pada jalan kaki ngelewatin jembatan kayu kelapa, nyebrangin solokan dan galengan sawah,wah resep bener pada ketemu ama tetangga disawah,ada nyeng pulang dari pasar dan ada nyeng baru mao pegih.

Lengkiyo nyeng ari biasa kaga dibeli lebaran mah kudu ada buat bikin campuran sambelan atawa bucak-bacek, tapi buat lalab ama sambel terasi,ikan gabus kering dan sayur asem go entuh lengkiyo berasa sumbrah bangat makan ampe nambah.

Dulu entuh pasar pan belon pada dipelur masing tanah lah kalo belanja pas musim ujan entuh orang pada belok,debel sendalnya,mana jaman dulu mah pakenya sendal lili nyeng kalo kena licin kaki pada melengso dipakenya,tapi resep dah apalagi kita dibeliin baju baru ama baba,baju cap sengget kalo pas kita demen ama baju nyeng digantung paling atas,lah masing kita kecil mah entuh nyeng namanya baju baru kudu kebeli lebaran mah, kita kalo ari lebaran kurang dua ari belon punya baju baru rasanya pengen mewek aja bawaannya,apalagi ngiat temen-temen kita pada nyedingin baju barunya,kaga berasa aer mata pada ngembeng,sedih beud baba kita lagi pada mikir ngejual apa ya biar bisa beliin baju baru buat di pake bocahnya di ari lebaran, apa ge dirambanin dah biar anak ama bini nya pada make baju baru, celana baru ama sendal baru, dia dewek mah ora di pikirin bagen pake peci ama sarung rada buluk ge nyeng penting bersih.

Baba kita kalo udah ari mo deket Lebaran entuh pada kedangsakan nyari duit buat beli olahan ama baju baru bocahnya, bagen dah pada jual daon kulit tupat go pada dilakonin buat ngebelain bocah biar pada punya baju baru,entuh baba kita girangnya ampe keati ampe netes airmata nya saking bangganya bisa beliin bocahnya baju baru….

Sarin ” Bang Ilok” Sarmadi.