Mancing lindung
Oleh : Bang Ilok
Kalo abis musim nandur,biasanya kita pada demen ama nyeng namanya mancing lindung, mancing lindung dutrun aja ampe kelancopan bisa nyampe cilangkap, tanjakan remaga ampe lobang baya saking resep nya dulu pan entuh nyeng namanya sawah pada nyatu tibang di pisahin ama kali doang,baru berasa pas pinggang berasa rada pegel jongkot ama nungging dipinggiran galengan .
Nyeng namanya mancing lindung dapet tambah resep kaga dapet jadi penasaran, tibang modal empan anak kodok bancet entuh lindung bisa kita pancingin nyeng penting lobang nya bener bukan lobang yuyu nyeng kita kilikin ,kalo salah lobang di mana -mana pan emang rada ribed hehe, resep giliran kita sentak tuh lindung kena,ugat -iget di kenur kita girang beud dah , nyeng sebel mana lindung gede kita sentak kaga ngikut kelepas lagi,mana kita gentak entuh lindung ampe jatoh nunclo di galengan , kita ma gali lobangnya entuh tanduran orang takut keurug udah gitu nyeng punya sawah lagi ada,kalo kaga ada abis dah entuh galengan di ojrot,digali ampe lindung kena lah gede selengen bocah ngenes pisan romanah ampe lemes saking kagetnya.
Bagen dah belon rejekinya dah kali masing banyak lobang nyeng belon kita kilikin ,lah bener aja kalo kita sabar mah Allah ge kasian ama kita nyeng atu lindung gede kaga dapet eh diganti ama nyeng rada kecitan dikit tapi dapet nya lumayan banyak pan jadi impas dah, jadi ini mah makan sore ama lindung goreng digepengin atawa kalo kaga punya minyak goreng digerumus di lobang dapur ampe rada item dibikinin kuwah pecakan ge entuh lindung sedep beud,manting nglingker di bokor ,nyeng ngurusin nya rada telaten mah entuh lindung abis digedig ampe gepeng dipotong-potong eh di pepes campurin tai babal lah gurih beud dah pokoknya,malahan kalo orang duluan lagi mah entuh lindung nyeng udah digedig dimasak pucung lah sedep bukan gabus aja nyeng dipucung lindung ge enak bikin makan jadi pada dokoh dah.
Entuh orang nyeng udah demen mancing lindung ampe tiap ari entuh kerjaan nya nginterin galengan sawah
pegi abis lohor bisa mao megerib baru pada nanjak ,tapi anehnya entuh lindung dulu mah kaga abis-abis padahal siang nya tiap ari dipancingin,malem nya dioborin tetep aja entuh lindung masing ada entuh lah keberkahan nya jaman dulu ….