Rambutan Masing Belatak
Oleh:Bang Ilok
Main kerumah temen dipetikin Rambutan,jadi inget jaman masing kita pada bocah, waktu engkong banda nya masing lebar,ntuh dikebon pohon apa go idup.Mo mangga tinggal petik,mo duren tinggal nunggu jatoh,mo salak tinggal ambil,duku,capi ampe alkesa,apalagi nyeng namanya rambutan tinggal nuturin saban ari pada merutug.
Ntuh yang namanya rambutan buahnya ampe mendot,udah gitu kaga cuman satu jenis rambutan ace konto,ace macan,ace kuning,ace pelat,ace ropiah, ace nyonya,ace binjai,ace manis dan ace lebak yang ampe bejibun,lah selebar kebon ada puun rambutan ampe resep ngiatnya apalagi kalo pas merahnya bareng,ampe abyor saking kiatan cakepnya.
Makan rambutan ampe mulut pada boes go dulu mah kaga ada yang beli, tinggal ngerambet aja rambutan nyeng kita pengen, entuh saban pagi kita beduluan ama bebek nutur rambutan nyeng pada merutug di orag kampret,kalo kesiangan dikit entuh rambutan nyeng merutug udah abis di sosorin ama bebek,apalagi kalo ada tengkulak nyeng pake geronjong lagi metikin rambutan kita ampe pada cokoh berebut rambutan nyeng pada rontog alias merutug pas dikilit ama galah.
Paling demen makan rambutan ace lebak nyeng Komeng, menor ntuh manisnya ampe kaya kita ngiat Paramitha Rusady masih muda,udah manis ntuh rambutan komeng mah kaga bebiji,jadi dikupas langsung kita makan isinya,ngope tapi kaga bebiji,ada ace nyonya manis banyak aernya ,uman kaga ngope,entuh kalo kita makan rambutan nyonya biar kenyang bijinya kita telenin abis kalo dilepiin pada ngumbuk nempel di tanah susah disapuin nya.
Nyeng lucu ada rambutan namanya ci manis tapi rasanya asem,entuh bocah karena dibilang ama engkong entuh rambutan manis buru -buru dah di taekin entuh rambutan eh pas dicobain rasanya asem,ada nyeng manis tapi kudu ampe merah rada keiteman dulu baru berasa manis,tapi kata engkong rambutan ci manis biar rada asem obat sariawan kaga bikin boes ama batuk makan seabreg-abreg ge,kaga kaya rambutan ci lebak nyeng makan kebanyakan bikin ampeg.
Masih inget ntuh buah rambutan kita bikin telor-teloran,ntuh kulitnya yang berambut kita pocelin pelan-pelan biar kulit dalem nya yang warna putih kaga kepocel,,udah entuh kita perolotin kaya orang beranak,tapi nyeng paling enak emang nyeng namanya rambutan ci ropiah ama ci pelat biar rada kecil dan ijo rasanya tetep manis kaga ada nyeng ngalain mangkanya harganya rada mahal,orang dulu kalo punya puun rambutan ciropiah 20 puun bebuah bisa kali mah beli kebo.
Metik rambutan dulu mah baba kita pake elang atawa pengki nyeng di iket pake tambang,entuh kalo pengkinya udah penuh diturunin dikerek tambang nya di ulur, entuh rambutan ditublekin pengkinya diiket lagi ditambang terus ditarik ngatas begitu seterusnya ampe rambutan nyeng rada merah abis di under, baba nyeng metik,enyak dibawah nguntingin atawa ngiketin lah kalo kita bagian nyaplokin rambutan nyeng pada copot dari tangklean nah,resep beud ngiketin rambutan ama keluarga deprok pake sarap daon pisang.
Sekarang rambutan masing banyak,tapi kita kaga bisa asal ngerambet kaya dulu,kudu minta dulu karena sekarang mah kalo nungguin dibagi mah kaga bakalan dikasih dah, kecuali nyeng punya orang nyeng udah conggah ama kita,kalo kaga conggah mah boro-boro ah nawarin paling ngeneng-ngenengin doang ,karang malah kalo mao makan rambutan rada banyak kudu beli…
rk6vin