Ngunduh Jambu
Oleh : Bang Ilok
Enak bener jaman dulu,ntuh nyeng namanya jambu aer,macem rupa ge ada,ada jambu kabongan,cingcalo,semarang dareh,jambu putih dan masing banyak lagi dah buahnya pada mendot ampe ada nyeng nyengser ke tanah saking banyak nya entuh buah jambu.
Cara metiknya tergantung pengennya ada yang manggrok kepuun nya,ada nyeng disengget pake galah bambu yang dicoak ada juga juga nyeng tibang disogok ntuh jambu nyeng merutug ditanggapin pake kaen panjang nyeng dibentang empat orang,jadi pas jambu jatoh pada ngumpul di kaen,lah bocah makan jambu bari manggrok bawa sambel ama garem,ngerujak di atas puun nya.
Pernah ada cerita ntuh ada ustad pulang shalat lohor dari mesjid,tengari bolong pleng-plengan,ngiat bocah lagi metik jambu kabongan ntuh ustad jadi dadiran,jambunya udah pada menor-menor ustad jadi kaga tahan nahan ilernya,sambil teriak si ustad ngangkat sarungnya buat nanggapin jambu.
” tong bagi gua setangkle nyeng lebet buat ngerujak” kata ustad rada teriak ama bocah nyeng asyik manggrok dipuun jambu sambil gegaresin ntuh jambu,si ustad saking kepengen nya ngiat jambu ampe lupa kalo dia tadi kemesjid kaga pake celana pendek tapi cuman pake daleman betmen doang.
Ada nenek-nenek lewat pulang ngewatun ngiat sih ustad pada tutup mata sambil cekikikan,si ustad bingung ngliat nenek- nenek pada tawa sambil ngeliatin kearahnya.
” Astagfirullah! ane lupa pake celana pendek” kata si ustad buru-buru nurunin kaen sarungnya.
” Pantesan rasanya adem-adem” kata siustad sambil tersipu malu,untungnya ntuh jambu udah neba dikaen sarung,bagen dah malu dikit ge ,lagian nyeng liat go nenek-nenek nyeng udah kaga doyan gituan,nyeng penting gua ngerujak dah,kata si ustad dalem ati.
Sekarang mah ngerujak jambu aer kudu beli ah,kalo kaga beli kaga ada nyeng bagi,jambu susah didapet,ada nyeng punya go udah dikit kaga belatak kaya dulu,udah gitu buahnya rada jelek kaga cakep kaya dulu kon,entuh jambu cakep beud buahnya manting mendot kita demen beud maen dibawahnya….