Oleh : Bang Ilok
Kodok Burut
Kangen ama suara kodok burut nyeng sekarang roman nya udah kaga kiatan lagi di kampung kita,dulu kalo ari mao magerib ntuh kodok pada kuar dari lobang nya,pada berebut nangkepin nyamuk atawa laron nyeng rada kecil pada berubul dari lobang ditegrepin pake lidahnya,saking doyan nya ama entuh laron kecil entuh laron disebut jadi laron kodok.
Kalo liat ujudnya ntuh kodok emang rada serem,gede,burik kulitnya manting ngegrinjil,kaya orang banyak kutilnya,dulu kalo kita pulang ngobor dari sawah ntuh kodok burut atawa kodok budug pade kiatan nyamperin cahaya petromak,ntuh kodok begitu khas bener bunyinya,dengerin kodok burut bebunyi di kolong bikin mata cepet merem nya ampe lagi kalo ari abis ujan.
Sarang nya pada di lobang samping dan belakang rumah nyeng ada giwingan, biasanya kalo ada lobang kodok suka ada nyeng namanya jamur kodok pada numbuh,ntuh jamur disebut jamur kodok emang bentuknya nongkrong,burik percis kaya kodok lagi ngedekem.
Gilenya ntuh jaman Porkas dulu ntuh kodok burut (budug) diburu orang buat nyari kode buntut dan nomor undian Porkas,ntuh kodok digosok perutnya dengan pikiran kaga warasnya ntuh orang ngarepin bakalan dapet nomor yang nongol dari perut kodok,nyeng sekarat perutnya digosok-gosok,ada lagi yang lebih serem ntuh kodok diambil darahnya buat rajahan ilmu pelet,ntuh darah kodok buat bikin tulisan dikertas berbentuk bahasa Arab,lah ntuh tulisan dari darah kodok burut(budug) dikantongin dibawa kemana-mana.
Dengan keyakinan ntuh tulisan nyeng pake darah kodok bisa bikin cewek nyeng pada ngiat ntuh orang yang ngantongin tulisan darah kodok,pada kelepek-kelepek ngiatnya..
Sekarang baru kerasa kite kangen ama ntuh kodok tapi bukan buat nyari kode buntut atawa bikin rajahan,tapi kangen ama suaranya nyeng udah kaga kedengeran lagi di kampung kita,entuh kodok awu dah pada merad kemana.
Nyamuk nyeng mangkin banyak karena kaga ada lawan nya nyeng dulu pada demen jagain kita, jaman nya rumah kita masing belon ada ubinnya,masing tanah tuh kodok burut pada demen maen dikolong bale tempat kita tidur,pada nangkepin nyamuk,sampe dulu ada iklan obat nyamuk yang make kodok jadi merek dagangan
” Kodok dateng..eh nyamuk pada ilang!”.
Mangkanya dulu mah kaga ada nyeng namanya penyakit demam berdarah,lah orang nyamuk nya abis di makanin ama kodok burut,lah sekarang entuh kodok pada ngilang nyamuk magkinan nyerabit dah….
Betawi punya cerita