BETAWI TEMPO DOELOE (Kangen ngebak di kali)

Oleh : Bang Ilok (Anggota KGPBR)

Berasa sedih emang kalo kita ngiat kali-kali di jaman sekarang,entuh aernya udah kaga ada nyeng bening pisan romanah,dulu ntuh aer kali berasa kita ngiat aernya ampe biru saking beningnya,apa ge nyeng ada di dalemnya bebayang kiatan,ntuh laya,ciput,simpil,sepat ama udang yang manting gerampang kiatan pada manggrok dibebatuan.entuh laya saking banyaknya,merapag kiatan dalem kali marong kuning kaya emas.

Masih bebekas entuh lebegnya tapak kaki kita di pinggiran kali kalo saban pagi ama sore baba ngajak kita mandi ngebak dikali,gegosokan ama batu biar daki pada mingser,ntuh sabun batangan B 29 kita bungkus pake daon pisang sengaja kita bawa buat mandi dikali.

Kalo pas pere sekola ntuh kali penuh ama bocah pada ngebak dari mentari baru naek ampe mentari udah lempeng diatas kepala,ntuh bocah kaga pada mingser saking betahnya pada berendem di kali atawa solokan,sudahan kalo bulan puasa mah entuh bocah kalo kaga diparanin baba nya rasanya ogah naek ampe magerib dikali saking entuh aer kali adem bet bikin puasa jadi kaga jebol.

Dari atas bendungan pintu aer entuh kita betah ngiat aer nyeng pada manting ngegerujug,ngiat rembetuk ama gonggo aer lagi pada main uber-uberan diatas permukaan aer,capung aneka warna merah,kuning,ijo dan biru pada mandi.

Di bendungan Ki Tiu dulu kalo saban pere sekola entuh bocah pada tumplek ada yang ngebak, mancing,nyari jodoh wah seru dah entuh bendungan jadi tempat wisata gratis bocah dari mana aja pada nyampe saking enaknya nya tuh tempat,dan beningnya aer kali Sunter saat entuh masing beciner bikin kita kaga tahan buat nyemplung ama ngebak searian disituh,dulu kalo kita abis nyawah kita masih sae cuci tangan ama kekumur pake aer kali kalo kita mao makan, bahkan entuh aer kali buat kita pada wudhu kalo pas lohor entuh kita masing ada di sawah,sembahyang diatas sajadah daon pisang di pinggiran kali berasa begitu khusyu,saat kita lagi nungging entuh suara aer pada beriak bikin ati kita deket ama pencipta,adem ati rasanya.

Disepanjang pinggiran kali entuh banyak pakis, tablo,cente dan banyak pu-un yang pada bikin adem buat ngasoh,kalo kita lagi makan abis nyawah entuh kaga susah nyari lalaban dipinggiran kali lalab apa ge ada,ada daon putat,daon mede,daon nangka ,daon jengkol belon lagi tumbuan nyeng kecit-kecit kaya senggagan,jonge dan laenya pokoknya berkah dah entuh di pinggiran kali,tinggal mutes kaga beli.

Abis ngebak biar enyak kaga marah kita pada nyari laya buat dibawa pulang, entuh laya saking bejibun nya kita rogoin ge kena,saking banyaknya ampe dapet sebuntelan,entuh laya kita buntel di kaos atawa baju kita ,bagen dah blopot ama bau dikit ge nyeng penting enyak kaga ngomel .

” Byuurr” suara orang ngelempar benda kekali bikin kita nyeng lagi bengong inget masa 40 tahun silam tentang kali nyeng bening dan bersih jadi buyar,entuh orang sekarang pada seenaknya pada buang bangke binatang kekali, padahal entuh kali aernya udah item ama limbah pabrik,baunya ge bikin kita enek jeleh,rasanya karang mah boro-boro kita pada mo turun tuh kekali cecauk aja go ogah lah bonggan ah entar kaki kita pada gudig dah sudahan nah.

Penataan dan pembuangan aer rumah tangga yang semrawut bikin aer kali jadi kotor,bau dan jorok,mending dulu orang buang aer rumah tangganya ke comberan yang digali dikebon kaga dibuang kekali, comberan nya dipiaraain Lele, pinggiran comberan ditanemin pu-unan nyeng ada hasil dan manfaat nya kaga kaya sekarang rumah pada berentet dibantaran kali semua limbah rumah tangganya dibuang kekali ditambah lagi ama ribuan pabrik dan perumahan juga buang kotoran nya kesitu abis dah tuh kali.

Pantesan dah sekarang mah kalo kali pada ngamuk pas musim ujan dateng,banjir dimana-mana lah iya ibarat kata entuh kali udah saking gedegnya ama manusia dah nyeng kaga open ama yang namanya kebersihan abis dah digerus apa ge nyeng ada di pinggiran kali,bukan aer nyeng salah tapi orangnya nya pada bikin aer pada ngambek.

Kalo ngiat nasib kali kaya begini rasanya susah buat dibenerin apalagi dibalikin kaya dulu mah, kasihan ama anak cucu kita yang dengernya cerita doangan kalo entuh kali bersih,bening dan indah sudahan nya tibang pada dadiran (ileran) doang pada dengernya,kaga bisa ngebak kaya babanya dulu waktu masing pada kecit,sekarang mo pada ngebak kudu pada bayar ,pengen maen di kali nyeng rada bening kudu pegih dulu ke tempat nyeng rada jauh …..

Betawi banyak cerita