Oleh : Bang Ilok
Hong Sepak
Rindu bet romanah kita ama nyeng namanya maen Hong Sepak,ntuh yang bite ditumpukin sebagai alat tanda permaenan,kalo yang jaga bisa ngamanin tumpukan bitenya ampe bocah yang ngumpet kena semua berarti tuh bocah yang jaga lulus kaga jaga lagi dan yang jaga diganti ama yang kena paling dulu.Kecuali ntuh ada yang bisa nyerobot bisa nyepak bite nah yang jaga tetep entuh dia lagi,maenan nya ampir sama ama maen inggo pake pada ngumpet segala,kalo inggo pake tiang atawa puun buat tanda kalo Hong Sepak pake bite,ntuh bocah kudu pada nempong tumpukan bitenya dulu Keja kena baru dah boleh pada ngibrit ngumpet.
Hong Sepak,tuh bocah nyeng jaga kalo udah nemuin kawan nya yang lagi ngumpet kudu nyebut nama tuh bocah pake hong,hong Udin,hong sianu dan anu,yang jaga juga kudu muter kalo kaga pengen dikatain jaga tumpeng.
Resepnya kalo maren Hong Sepak kita dulu pada ngumpet di kolong rumah,pan rumah dulu masing pada pake panggung ama loteng.
Kita demen bet kalo ngumpet nya bareng temen empuan yang kita demen,beduan di kolong panggung rasanya gimana gitu dah..ahay seru dah,lah jangan mikir yang macem-macem lah kita masing pada bocah lagi dulu mah kita jangan kan megang tangan empuan,nyolek aja juga kita malu.
Sebelnya lagi ngumpet di kolong rumah atawa bale ketemu ama ayam nyeng lagi ngerem abis dah pantat kita dipacokin,udah gitu pas kita lagi ngesod di bawah panggung entuh ada tai kucing kecemek..lah abis kaga kiatan ntuh tai kucing pada keurugan abu,kucing dulu mah pan begitu masih pada punya adab kalo berak pada diurugin abu biar kaga bau,kaga kaya kucing sekarang yang maen berak dimana aja.
Sambil ngumpet ada sarang Undur-undur tuh bocah sambil nunggu nyepak bite,tangan nya ngorek undur-undur,entuh Undur-undur yang udah kena dimasukin ke celana temen ngumpetnya.. walhasil tuh bocah nyeng lagi asyik ngumpet pada gegunteng kegelian.
Lagi asyik ngumpet di pu-un pisang ada angkup ngerambat kemuka,yang seru lagi entuh bocah lagi pada ngumpet di belakang dapur keseblok ama aer kobokan,abis dah tuh bocah bajunya cipruk kena siram aer kobokan Sepaso .
Pokoknya nyeng namanya maenan lagi bocah mah kalo kita ceritain kaga abis-abisnya saking resep ama banyak kenangan indah yang kaga bisa kita lupain dah ampe kapan pun juga,entuh baru atu maenan belon maenan laen yang lebih seru.Sayang segitu banyak maenan bocah jaman dulu kini kudu abis kegerus ama jaman,kaga ada nyeng nerusin…
Betawi banyak cerita