Oleh : Bang Ilok
Abis ujan
Jaman dulu kalo malem ari abis ujan orang pada ogah kuar rumah,pada merungkud di atas bale keredong sarung, sambil ngopi atawa ngeteh ngeriung ama keluarga sambil ngobrolin apa aja nyeng kita kerjain tadi siang,ogah kuar ongkoh entuh jalan pada nyeblok udah gitu gelap ngejumbleng belon ada lampu,lah kalo kaga ujan orang pada masang colen di setiap gang biar terang lah enih abis ujan masing gerimis colen kaga idup .
Ngopi atawa ngeteh tibang ama kukusan ganyong ama gadung aja berasa beud nikmatnya, baba cerita dah tentang sawahnya nyeng bentar lagi mo musim nandur, enyak dengerin sambil jaitin celana kolor baba nyeng pada bolong,lah entuh bocah asyik pada bedempelan di kaen sarung babanya,pada berebut nepakin asep rokok jinggo baba nyeng dibikin bulet-bulet.
Tabunan pesak ama tai gergaji ngelun bae di jogan luar,udah biasa orang dulu kalo malem pada nabun buat ngusir nyamuk kebon nyeng pada masuk rumah,kalo lagi pas ada singkong ama ubi nyeng abis di cabut entuh biasanya tinggal ngejeblusin aja ke tabunan, mantabs beud makan singkong bakar rada angus dikit pas cuaca lagi rada dingin.
Biasanya kalo abis ujan entuh nyeng namanya laron pada nongol dari lobang tanah pada nyari pelita nyeng di pasang di rumah-rumah,laron udah banyak enyak ambil aer sebaskom pelita di taro di tengah baskom nyeng ada aernya,lah entuh laron pada merutug masuk pada nyebur ke baskom,ampe penuh entuh baskom ama laron,udah banyak entuh laron di kupyak di nyaringan di buangin sayapnya …abis entuh enyak nyalain api di dapur lah entuh laron di goreng dah, makan goren laron abis ujan berasa nikmat apalagi makan nya pada ngumpul di bale.
Dulu berasa berkahnya makan apa ge berasa enak dan nikmat ,abis ujan kaga ada lauk tibang makan ama bawang goreng,terasi ama garem aja sumbrah beud ampe nambah.
Perut udah kenyang kena angin mata ngantuk,abis sembahyang isya udah aja pada rebahan di bale nyeng di alesin tiker pandan,tiker pandan kalo abis ujan berasa anget udah entuh kita pada belonjoran sambil dengerin radio noble pas acaranya sukaan engkong siaran lagu semi sunda , sementara suara kodok belentung di comberan samping rumah pada manting umres bikin mata tambah pules.
Lah kaga pake kipas angin ge dulu mah berasa adem ama angin kaga gerah kaya sekarang udah pake kipas angin tetep aja masing beringsang….
Betawi banyak cerita