Oleh : Bang Ilok
Ngerogoin Udang
Resep bet dulu jaman solokan masing bening, masing sae aernya buat kita pada berendem belon kena cemar nyeng namanya limbah pabrik, buangan aer dari perumahan,butek paling pas lagi ada aer ujan nyeng pada gabung masuk kesitu.
Entuh di solokan kita pada demen ama nyeng namanya ngerogoin udang ,udang pan demennya pada ngemped dipinggiran,dalam gowok atawa pada ngemped di akar rumput,asal kita rogoh pada manting meletik ditangan buru-buru dah kita gengem kita masukin di ember kita aramin pake rumput biar kaga pada meletik.
Ngerogoin udang eh kita bisa ngena Lele atawa yuyuk ,kalo pas kita rogoin nyeng kecemek lele,kita buru-buru dah minta tolong ama nyeng bisa nangkep lele,soalnya entuh lele lokal kalo kita kaga bisa nangkepnya kita bisa kena patilnya,kena patil lele kata baba kita bikin badan meriang panas dingin tapi entuh nyeng namanya lele lokal gurih bet jauh ama lele dumbo mah ,kalo tibang yuyuk mah biar dia nyapit ge bisa kita genggem,nah kalo yuyu nyeng rada gurih yuyu santen nyeng cangkangnya ama kakinya rada empuk
Berendem di solokan searian dulu mah kaga bosen apalagi kalo bulan puasa abis lohor berendem bedug ashar lewat entuh bocah baru pada nanjak, berendem paling kaga resep kalo lagi asyik ngerogoin udang eh ..ada anuan ngambang lewat pas di muka kita,biasanya kalo begitu di atas ada nyeng lagi kebelet kaga nahan ngebak ampe berak di solokan.
Udang nyeng kena kita rogoin kita sindikin pake lidi kita bikin sate kita garang di atas nyanyaan dari genteng diatas lobang atas dapur belah belakang atawa kita garang di lobang dapur kita bari pegangin sambil gegeni ,ngangetin awak nyeng rada dingin abis mandi, kalo kiatan udah rada kuning ama item dikit entuh udang udah mateng siap ditutul ama sambel atawa di bikin pecak udang.
Lah udang mah selaen di tutul ama sambel dan di pecak ,enak juga di bikin pelas kaya model dipepes campurin ampas kelapa, udang nyeng rada kecilan dimasukin botol dicampurin nasi di bikin bekasem nyeng nantinya kalo udah jadi dimasak di campurin nangka muda (cecek),ada juga nyeng demen di bakwan atawa di pepes campurin tai babal,biasanya kalo udang pepes di campur ama anak gerayak dan ikan seruet, mo diapain ge udang mah semuanya ge enak dan gurih rasanya.
Ada bocah nyeng lagi puber entuh telor udang di perodin di atas bibir ama di dada, kata orang tua kita dulu entuh telor udang paling ampuh buat numbuin kumis ama bulu dada ,uman kudu betah nyium bau amisnya.
Dulu nyeng namanya udang emang berasa kaga ada abisnya udah di rogoin,pancingin ampe di ancoin entuh udang pas empang atawa solokan di keringin tetep aja banyak.
Sekarang mah susah romanah nyari udang,ada ge kudu beli dan harganya rada mahal ….
Betawi banyak cerita
Bang ILok