BETAWI PUNYA CERITA

Masing Puasa

Oleh : Bang Ilok

Dulu kalo puasa begini kita paling demen maen kesawah, pada demen ngebak di sawah Balongan pada lomba berenang telentang,ntuh bocah nyeng udah bisa mah enak bener diliatnya bisa ngambang diaer sawah,kalo nyeng belon bisa mah ngelem ampe nelen aer gelagepan .

Bosen berenang pada maen lempogan lumpur, ntuh muka ama badan abis pada belepotan…gedegnya ama temen nyeng rada tengal kita lagi ketawa ntuh lumpur dilempogin pas mulut kita,ampe ada nyeng ketelen ntuh lumpur, untungnya sawah jaman dulu mah lumpur nya masih alami kaga kena limbah jadi kaga jember.Bosen ngebak disawah Balongan ntuh bocah pada nanem genjer disawah Balong nyeng udah dikeringin aernya,pada bikin petakan- petakan kecil yang bikin batesnya pake lumpur biar ketauan batian punya kita,biar ketauan entar metik asilnya

Girang beud entuh bocah kalo lagi puasa pada berendem di sawah,kaga berasa aus dan lapar,tau- tau udah bedug ashar ntuh bocah pada ngebilas digerojogan,biar pulang kaga diomelin karena pada cipruk basah-basahan,ntuh bocah pada ngunder daon putat muda buat lalab,pu-un putat biasanya banyak tumbuh di bantaran kali,
Metik daon putat kudu awas jangan ampe salah petik entar siwer sedikit entuh bisa salah petik, ntar daon rengas muda nyeng kepetik lah bisa berabe..ntuh tangan bisa pada buyutan( beruntus gatel) apalagi ampe kelalab bisa juig tuh mulut.

Bocah nyeng rada pinteran dikit entuh pada metikin daon waru buat dijual di warung,pan dulu masing jaman langka kertas entuh buat bungkusan masing serba daon,nah salah atunya make daon waru buat bungkusan ikan, cabe,terasi,bawang ampe garem umpakan dibungkus ama daon waru. Entuh bocah bedua metikin daon nyeng laen pada mungutin bari ngiketin sekira udah boleh sepuluh iket entuh bocah nyeng trekelan di pu-un waru turun dah,ngukug dah entuh bocah pada kewarung kelontong buat ngejual entuh daon waru.

Sepuluh perak seiket ada sepuluh iket jadi dapet seratus perak entuh bocah duit hasil ngejual daon waru,dibagi empat lumayan kebagian arang jigo,eblas beud entuh bocah jalanah megang duit segitu entuh dulu bisa beli permen beko,kerupuk sayong ama es serut nyeng dijepit lumayan buat buka,entuh ade,kita pulang bawa gituan girang beud enyak ama baba ge kaga marah pisan lah onoh sukaan nah daon putat pan kita petikin buat lalab makan buka malem enih,ati kita girang beud rasanya bisa ngasih ade , enyak ama baba kita walau tibang gituan ge….

Betawi,16 Ramadhan 1441 H
Bang ILok